Iqembu leNkatha Freedom Party (IFP)KwaZulu-Natal iyathokoza ngokumemezela impumelelo yalo emangazayo okhethweni lokuchibiyela lwayizolo, okwenze i-IFP yathatha amawadi amathathu ebincintisana kakhulu kuwo neqembu-ANC, kuMasipala waseNewcastle.
KuWadi 12, i-IFP idle amahlandla ngamamavoti angu-1 973, uma kuqhathaniswa namavoti e-ANC angu-763, i-EFF yathola angu-94, kwathi iTSSA yathola angu-256.
Ngokufanayo, kuWadi 19, i-IFP ithole amavoti angu-1 566, yadlula amavoti e-ANC angu-732, amavoti e-EFF angu-65, namavoti angu-137 eTSSA.
KuWadi 23, i-IFP ithole amavoti angu-1 498, kwathi i-ANC yathola amavoti angu-315, i-EFF yathola angu-0, kwathi iTSSA yathola angu-213.
Le miphumela iphinde igcizelele ukwesekwa okubalulekile, okukhulayo kwe-IFP.
Sedlulisa ukubonga kwethu ngokujula kwenhliziyo kubo bonke abalandeli bethu, amavolontiya, nezinhlaka ngokuzinikela kwabo ngentembeko eqenjini lethu.
Ikakhulukazi, i-IFP ingathanda ukubonga unobhala wethu wesifundazwe uMnu Xolani Dube ngobuholi bakhe ngesikhathi somkhankaso.
I-IFP iphinde yelule ukubonga kwayo kubantu baseNewcastle ngokusethemba ngamavoti abo kanye nokukhombisa ukulethemba kwabo iqembu le-IFP njengelingenza kangcono kakhulu.
Siyawubona futhi siyawazisa umthwalo omkhulu esibekwe phezu kwethu, futhi sizibophezele ekukhonzeni abavoti bethu ngokuzinikela nangobuqotho.
Lokhu kunqoba okumangalisayo kuwubufakazi befa laphakade loMsunguli we-IFP ongasekho kanye noMongameli Emeritus, u-Mntwana uMangosuthu Buthelezi. Ukuzibophezela kwakhe ezimisweni zokwethembeka, ukuthobeka, nobuqotho kuyaqhubeka kusikhuthaza njengoba silwela ukwesekela ifa lakhe.
Njengoba sisondela Okhethweni Lwezifundazwe kanye Nolukazwelonke, lokhu kunqoba okhethweni lokuchibiyela kuqinisa ukuzethemba kwethu futhi kuqinisekisa ukuzibophezela kwethu ekuletheni izinguquko eziphusile kubantu baKwaZulu-Natal.
Sigqugquzelekile futhi sizimisele ukwakhela phezu kwalo mfutho, njengoba siqhubeka sibheke emgomweni wethu wokwakha kabusha iKwaZulu-Natal kanye neNingizimu Afrika.
Sinxusa amakhansela ethu asanda kukhethwa ukuthi alingise ubuholi obuyisibonelo bukaMntwana uMangosuthu Buthelezi, bokusebenzela abantu ngokuzinikela, ngokwethembeka nangokuthobeka.
