Kulobe:Thabiso Vilakazi
Iminyango emithathu ebalulekile yaKwaZulu-Natali, uMnyango wezemiSebenzi yoMphakathi, uMnyango wezoLimo nokuThuthukiswa kwezindawo zaseMakhaya, kanye noMnyango wezokuThuthukiswa koMnotho, ezokuVakasha kanye nezeMvelo, ihlangene namuhla 21/102025 ukuze kusayinwe ngokusemthethweni isivumelwano sokubambisana (MOU) okuhloswe ngayo ukuqinisa ubudlelwano nokusebenzisana kumaphrojekthi amaningi agxile ekusetshenzisweni komhlaba, ingqalasizinda kanye nokuthuthukiswa komnotho. Ongqongqoshe bayo yomithathu iminyango nabo babelane ngamazwi abo ngokubaluleka kobambiswano.
Izinhlelo ezibalulwe zobambiswano zihlanganisa ukuthuthukiswa nokwabelana kwengqalasizinda, ukusekela izinhlelo zezolimo, kanye nokukhuthaza izinhlelo zokulinywa kwamasimu ukuze kugqugquzelwe umnotho wendawo. Ongqongqoshe bakugcizelele ukuthi ukusebenzisana kuzosiza ukusebenzisa kangcono izinsiza zomphakathi.
Ekhuluma kulo mcimbi, uNgqongqoshe wezokuThuthukiswa koMnotho, ezokuVakasha kanye nezeMvelo, uMhlonishwa uMfundisi Musa Zondi, uthe unethemba lokuthi ukuhlanganiswa kwalobu budlelwano kuzobahlanganisa ‘nomgomo owodwa ohlanganyelwe. Okuwukwenza umhlaba ube umgqugquzeli wokuvikeleka kokudla, umhlaba njengomgqugquzeli wokukhula kwezimboni, kanye nomhlaba njengomgqugquzeli wokwakhiwa kwamathuba emisebenzi’. Ungqongqoshe uphinde wakhuluma ngezinhloso zobambiswano zokwakha izimboni ezisimeme ezindaweni ezake zashiywa ngaphandle.
Umcimbi wokusayinwa kwawo ubuse Coastland Musgrave Hotel, Thekwini, lapho oNgqongqoshe bayo yomithathu iminyango behlangene ukuze benze ngokusemthethweni ukuzibophezela kwabo ekuthuthukiseni nasekukhuthazeni intuthuko esimeme kuyo yonke i-KZN.
