Imizamo eqhubekayo kaMeya kaMasipala weTheku, uKhansela Cyril Xaba yokunciphisa ukuvuza kwamanzi nokuchitheka kwendle iyaqhubeka nokuba namandla njengoba ebuyile namuhla eMlazi, ukwandisa uhlelo lokungenela ukulethwa kwezinsizakalo kumaWadi 83, 85, 86 kanye no-87.
UMeya uXaba ubezifikele ehola ukuhlolwa okuphezulu kwengqalasizinda yamanzi nendle kaMasipala nethimba lezikhulu elixube izinhlaka ezahlukene.
Ngesikhathi sokuhlolwa, uMeya uXaba uthokoze kakhulu ukuthola amaqembu amanzi nendle ezindaweni ezahlukene elungisa ukuvuza kwamanzi kanye nokuhlanza ukuvaleka okukhulu kwenethiwekhi yendle.
“Amaqembu ethu akhishiwe ukuba esebenze amacala abikiwe okuvuza kwamanzi nokuchitheka kwendle. Sikhuthaza ukusabela okusheshayo okuyilokho imiphakathi yethu ekudingayo. Uma siqhubeka ngale ndlela, sizophinde sinciphise ukuvuza kwamanzi,” kusho yena.
Lokhu kungenela edolobheni lonke kuyingxenye yohlelo olusheshisiwe lukaMasipala lokubuyisela ingqalasizinda ebalulekile yomphakathi ngokuthumela amaqembu ezindaweni ezithinteke ukuvuza kwamanzi okuqhubekayo nokuchitheka kwendle.
UMeya uXaba unxuse amalungu omphakathi ukuthi avikele ingqalasizinda yawo ngokuyeka ukulahla izinto zangaphandle emigodini yendle.
Uphinde waxwayisa ngokuthi ukusetshenziswa kabi kwengqalasizinda yomphakathi kuseyimbangela enkulu yokuvaleka okulokhu kuphindile kohlelo lwendle kuMasipala wonke.
Ngaphezu kwalokho, uMeya uXaba ukhuthaze izakhamuzi ukuthi zibike ukuxhumeka kwamanzi ngokungekho emthethweni, okugcwala ngokweqile ingqalasizinda yamanzi nendle ekhona kule nombolo yamahhala 080 311 1111, zithumele umyalezo ku-WhatsApp ku- 073 1483 477
Emavikini amabili edlule, uMeya uvakashele amaWadi 80, 81 kanye no-88 aseMlazi lapho ememezele khona ukuthi inani lokuvuza okubikiwe lehle kakhulu lisuka ku-13 000 laya ku-3900 selokhu kwaqala uhlelo ezinyangeni ezimbili ezedlule.
