Umasipala waseThekwini utshala isamba sika-R260 wezigidi emisebenzini emikhulu yamaphrojekti engqalasizunda eminyakeni yezimali emithathu, kusukela ngo-2024/25 kuya ku-2026/27, ngenhloso yokuthuthukisa izindawo zokuhweba zabathengisi abancane, ukwenza ngcono izimo zokusebenza, kanye nokwandisa amathuba ezomnotho kubathengisi.
Lolu hlelo lokutshala izimali lugqanyiswe engqungqutheleni yesihlanu ye-eThekwini Informal Economy Summit, ebibanjelwe esikhungweni se-Durban Exhibition Centre ngomhla ka-20 na-21 kuMfumfu. Le ngqungquthela ihlanganise abathengisi, iminyango kahulumeni, izikhungo zezimali, kanye nababambiqhaza baleli qhaza lomnotho. Izinhloso zayo kwakuwukwethula izinhlelo zokweseka ezikhona njengamanje, ukuchaza amapulani azayo, ukubheka amathuba oxhaso lwezimali, kanye nokuhlonza izindlela ezibambekayo zokuqinisa amabhizinisi nokukhulisa umnotho ongahlelekile.
Izethulo zifake phakathi amaphrojekthi amakhulu, izimakethe ezizoba izindawo ezibalulekile , isimo somnotho ongahlelekile weDolobha, uxhaso lwezimali lwezitolo zomphakathi, ukuthuthukiswa komnotho wasemalokishini, kanye nezisombululo kwezokubhanga. Abathengisi baphinde babuka nevidiyo ekhombisa amaphrojekthi asephelele, kuhlanganise neMansel Road Market esanda kwethulwa kanye neLucky Mngwengwe Traders Precinct, kanye nenqubekelaphambili emaphrojekthini asaqhubeka.
Ekhuluma nabathengisi, iMeya yaseThekwini uCyril Xaba uthe umnotho wamabhizinisi amancane usalokhu uwumthombo obalulekile wokuziphilisa kuleli Dolobha. Ngokwemininingwane yeStatistics South Africa yeQuarterly Labour Force Survey, balinganiselwa ku-260,000 abantu baseThekwini abasebenza kulo mkhakha ongakahlelekile, kanti ababaliselwa ku-75,000 babo bakumkhakha wezohwebo olungahlelekile. Leli Dolobha liphinde labhalisa izinga eliphansi kakhulu lokungasebenzi phakathi kwamadolobha amakhulu aseNingizimu Afrika engxenyeni yesibili yonyaka ka-2026, eliku-21.2%.
UMeya Xaba uthe: “Umnotho wamabhizinisi angahlalekile unendima ebaluleke kakhulu empilweni yezakhamuzi zaseThekwini. Udala amathuba emisebenzi, weseka imindeni, futhi ukhulisa imiphakathi yakithi.”
Le ngqungquthela iphethe ngezindondo ze-Informal Traders Recognition Awards, ezihloniphe abathengisi abangama-32 abaqhamuka ezifundeni zonke zeDolobha ngaphansi kwemikhakha emine: Ibhizinisi Eliphethwe Yintsha, Ibhizinisi Eliqanjiwe Ngobuchule , Ukudalwa, kanye Nokuhlonipha Ngokuphelele Imithetho Kamasipala. Abawine kulezi zindondo baqhuba amabhizinisi ahlukahlukene, kuhlanganise nalawo okulungisa izinwele nobuhle, imfashini nokuklama, izinsiza zezimoto, ukusebenzisa kabusha udoti, ezokuthwebula izithombe, ezamakhambi esintu, kanye nokudla okudayiswayo
