Inhlangano engenzi nzuzo i Jabulile Foundation yaseNdwedwe endaweni yaseThafamasi ngaphansi kweNkosi yesizwe sakwaShangase,ibihlelele abafundi bebanga le -12 umcimbi wombukiso wezemfundo ngomhla wezi 09/04/2024. ”Lomcimbi obubanjelwe esikoleni iBuhlebesizwe High School nobekuhloswe ngawo ukucija abafundi bebanga leshumi nambili ngolwazi lwemikhakha ehlukahlukene kwezemfundo nabangazikhethela ukuyilandela ngonyaka ozayo”, kulandisa uNksz Anele Shangase usihlalo wenhlangano.
Bekungokokuqala ukwenzeka kohlobo lwalomcimbi endaweni nosekuletha inhlansi yethemba ngentuthuko endaweni ,loku kubonakaliswe injabulo yabafundi. Impumelelo enkulu yalomcimbi inezelwe izehambeli nezidlale indima enkulu ekuqwashiseni abafundi. Phakathi kwezikhulumi singabala uNomkhosi Gcabashe,obemele isikhungo sase DUT ophikweni lwase Mgungundlovu,uFanele Sibiya obambisene ne UKZN Howard Campus,uDokotela Khangelani Sibiya oqhamuka eRichardsbay noyewethula izinkulumo ezigqugquzela ziphinde zakhe abafundi , uDokotela Sibiya ungumphathi wesikhungo esisiza abafundi bebanga 12 ukwenza kahle ezifundweni zabo.
”Kuningi okuhle esifisa ukukwenza kulendawo yakithi eNdwedwe ikakhulukazi ensingweni,leFoundation siyisungule ngokuhlanganyela singabazukulu bagogo ongasekho uJabulile Mamthalane Shangase. Ugogo wayewumuntu omnene nothandayo ukwelula isandla lapho kunenswelo khona,kungakho sikhethe ukumkhumbula ngokwenza lenhlangano ezosiza kakhulu ngokulekelela lapho inokuthi isize khona emphakathini” kuchaza u Nkosazane Anele Shangase. ”Sithanda ukudlulisa ukubonga kubo bonke abaye baba yingxenye yalomcimbi kanye nazo zonke izikhulumi zethu ikakhulukazi isikhungo sase UKZN esisize kakhulu nange Transport ebishoda”,kuphetha uSihlalo u Anele Shangase.
